CCCLXXVII.

1493, Juni 4. Neisse.

Notariatsinstrument über die Schenkung des Patronatrechtes zweier Altäre in der Pfarrkirche zu Neisse an das Stift.

In nomine domini amen. Anno a nativitate eiusdem millesimo quadringentesimo nonagesimo tercio indictione XI° pontificatus sanctissimi in Christo patris et domini, domini nostri Alexandri divina providencia pape sexti, anno ipsius primo, Martis die, quarta mensis Junii hora XII vel quasi, in stuba habitacionis honorabilis viri, domini Johannis Ritther in platea episcopali in Nissa, in mei notarii publici testiumque infra scriptorum ad hoc vocatorum specialiter et rogatorum presencia constituti personaliter honesta et providi, Katherina relicta quondam Martini Hoppener sutoris, Balthisar et Melchiar filii ipsius et legittimi heredes, sani mente et corpore et per omnia bona fruentes racione, non coacti nec decepti aut quovismodo improvide inducti seu sinistre circumventi, sed ex certa ipsorum consciencia ac deliberacione, matura et diligenti prehabita, publice recognoverunt, se habere presentacionem sive ius patronatus duorum altarium seu ministeriorum in ecclesia parochiali sancti Jacobi in Nissa iacencium, unum ministerium super altari sancti Martini ex opposito Corporis sancti, et aliud in cappella dicta Brawnynne, que est prima post cappellam sancti Laurencii ex altera parte ianue. Tale ius presentandi seu patronatus habuerunt, tenuerunt et a longo tempore pacifice et quiete possiderunt, prout incorporacio plenius continet. Eandem presentacionem sive tale ius patronatus predicta Katherina Hoppnerynne, Balthisar et Malchiar, filii ipsius et legittimi heredes, dederunt, donaverunt et inter vivos irrevocabili donacione assignaverunt perpetue et hereditarie possidendam, reverendissimo in Christo patri ac domino, domino Jacobo abbati in Kamentcz protunc et omnibus aliis abbatibus sequentibus eiusdem conventus, qui pro tempore fuerint, transfundantes nichilominus sepedicti Katherina, Balthisar et Malchiar, filii et legittimi heredes in prefatum dominum abbatem ac suos successores, qui pro tempore fuerint, omne ius eorum, quod ipsis competebat, in futurum et peramplius habendum, tenendum ac possidendum sine contradictione seu aliqua impedicione predictorum donatium sive amicorum ipsorum; ita tamen, quod quandocumque unum inter duo dicta altaria vacaverit, tunc predictus abbas vel qui pro tempore fuerit, presentabit sepedictum Balthisar, filium predicte Katherine ad huiusmodi altare et non alium, et hic, si ydoneus fuerit ad acceptandum; sin autem protunc capax non esset, tunc ministerium, quod primum vacaverit, dabitur sibi, ita, quod supersit primus expectans. Super quibus omnibus et singulis premissis ad requisicionem prefati reverendissimi patris, domini Jacobi abbatis in Kamentcz confectum est hoc presens instrumentum publicum per me Johannem Militis notarium publicum infra scriptum. Acta sunt hec anno, indiccione, pontificatus, die, mense, hora et loco, quibus supra; presentibus ibidem discreto et honestis viris: domino Johanne Holffericht confratre monasterii fratrum in Kamentcz, Thome Groeschel civi Nissensi et Mathie Funcke sutori, testibus ad premissa vocatis pariterque rogatis.
Signum notarii.
Et ego Johannes quondam Mathei Militis de Nissa, clericus Wratislaviensis dyocesis sacra imperiali auctoritate notarius publicus, quia premissis donacioni, resignacioni et cessioni aliisque omnibus et singulis, dum sic, ut premittitur, agerentur et fierent, una cum prenominatis testibus presens fui eaque sic fieri vidi et audivi; ideoque hoc presens instrumentum manu alterius fideliter conscriptum et per me pronuncciatum exinde confeci, publicavi et in hanc publicam formam redegi, signoque et nomine meis solitis et consuetis consignavi in fidem et testimonium omnium et singulorum premissorum rogatus et requisitus.

Or. Perg.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.